Регионсем хушшинчи обществăлла организаци

Чăваш наци конгресĕ

Чувашский национальный конгресс

Чăваш тĕнчи

2017, чӳк (ноябрь), 6(84) №

Сăнсем

Видеосем

Людмила Балтаева куравĕ уçăлчĕ.

Шырав

Çыхăну

Адрес: 428032 г. Чебоксары, ул. Композиторов Воробьевых, д. 10

Телефон: (8352) 62-35-61

Факс: (8352) 62-82-05

Эл. адрес: congress21@mail.ru

Пирĕн вăй - туслăхпа пĕрлĕхре

20.11.2013 15:53
Пирĕн вăй - туслăхпа пĕрлĕхре

Чăваш Республикине 100 яхăн халăх çынни тăван кĕтесĕ тесе шутлать. Чăвашпа вырăс, тутарпа мăкшă, пушкăртпа çармăс тата ыттисем пĕр-пĕринпе килĕштерсе, пĕр-пĕрне пулăшса туслă пурăннине нимĕн те çитмест.

Çак сăмахсене Чăваш Республикинчи тутарсен наципе культура автономийĕн Канашĕн ертÿçи Фарит Гибатдинов Чăваш наци конгресĕн VIII-мĕш Аслă Пухăвĕ иртнĕ ятпа янă çыру та çирĕплетет.

"Чăваш Республики, уйрăмах пирĕн Каçал тăрăхĕ, Раççейĕн пур регионĕшĕн те тĕслĕх пулса тăма пултарать: кунта ĕмĕртенех чăваш, тутар, вырăс çыннисем туслă çемьери пек пурăнаççĕ. Чăваш халăхĕн авалтан пыракан ăс-кăмăлĕ пире пурне те çураçуллă пулма май парать. Çапах та Чăваш наци конгресĕ хăй çине питĕ пысăк тивĕç илет: мухтавлă чăваш халăхĕ хăйне хăй хисеплеме çĕнĕрен вĕрентĕр, пулас ăрусене те çак хисепе, культура пуянлăхне халалласа патăр, ытти халăхпа та тăванлă пултăр тесе тăрăшатăр эсир. Ку вăл питĕ пысăк ĕç. Хăйĕн аваллăхне пĕлекен, пуласлăха ăнтăлакан халăх пурăнатех. Вăл çĕр чăмăрĕ çинчен çухалмĕ, этемлĕхĕн ăс-хакăл арчине хăйĕн ылтăн-кĕмĕлĕпе пуянлатĕ", - çапла хавхалантарать пире тăванла тутар халăхĕ ячĕпе Фарит Гибатдинов.

Шупашкарсем Çеçпĕл Мишшин çуралнă кунне паллă турĕç

19.11.2013 11:55
Шупашкарсем Çеçпĕл Мишшин çуралнă кунне паллă турĕç

Эрнекун, чÿк (ноябрь) уйăхĕн 15-мĕшĕнче, Шупашкарта кăвар чĕреллĕ чăваш поэчĕ Çеçпĕл Мишши çуралнăранпа 114 çул çитнине паллă турĕç. Уява Çеçпĕл Мишшин обществăлла ыр кăмăллăх фончĕн председателĕ, Чăваш халăх поэчĕ Валерий Тургай, Чăваш наци конгресĕн пĕрремĕш вице-президенчĕ Валерий Клементьев, Чăваш çамрăкĕсен "Сăвар" пĕрлешĕвĕн ертÿçи Олег Цыпленков тата ыттисем хутшăнчĕç.

Поэт палăкĕ умне чечек çыххисемпе пухăннă çынсем Çеçпĕл Мишши чăваш чĕлхине аталантарма тĕлĕнмелле хăватлă ĕç тунипе, хăйĕн вышкайсăр пысăк пултарулăхĕпе яланлăхах халăх асĕнче пуласса палăртрĕç.

Ревизи комиссийĕн çĕнĕ ертÿçи паллă

18.11.2013 14:30
Ревизи комиссийĕн çĕнĕ ертÿçи паллă

Чÿк (ноябрь) уйăхĕн 15-мĕшĕнче Чăваш наци конгресĕн ревизи комиссийĕн пĕрремĕш ларăвĕ иртрĕ.

Комисси членĕсем уççăн сасăласа председатель пулма Николай Капитонова шанчĕç, унăн çумĕ Людмила Семенова пулĕ, секретарĕ вара - Алексей Ефремов.

Конгресăн пĕрремĕш вице-президенчĕ - ĕçтăвком председателĕ Валерий Клементьев комиссин çĕнĕ йышне туслă тата пĕр-пĕрне ăнланса ĕçлеме сунчĕ.

Пуринпе те çураçуллă ĕçлемелле

14.11.2013 16:57
Пуринпе те çураçуллă ĕçлемелле

Ĕнер, чÿк (ноябрь) уйăхĕн 13-мĕшĕнче, Чăваш наци конгресĕн Президиумĕн черетлĕ ларăвĕ иртрĕ.

Ларура пăхса тухнă тĕп ыйтусенчен пĕри VIII Аслă Пухăвăн йышăнăвĕсене редакциленĕ хыççăн тепĕр хут сÿтсе явса çирĕплетесси пулчĕ. Президиум членĕсем Чăваш Республикин патшалăх тата вырăнти органĕсемпе тачă çыхăну тытса чăваш халăхĕн хăй евĕрлĕхне, йăли-йĕркине, культурине тата чĕлхине малалла аталантарас енĕпе малашне те тĕллевлĕ ĕçлемеллине, Раççей Федерацийĕн субъекчĕсенчи тата урăх çĕршывсенчи чăваш наципе культура ушкăнĕсемпе çыхăнăва анлăлатмаллине, пĕрлештернĕ ĕç планĕ тумаллине палăртрĕç.

Ларăва пухăннисем Конгресăн тĕп ыйтăвĕсемпе ĕçлеме 11 комитет туса хучĕç. Вăл шутра - чăваш ялне аталантарас, халăх сывлăхне сыхлас, ăна социаллă хÿтĕлев парас, культура, вĕрентÿ шайне ÿстерес тĕлĕшпе ĕçлекеннисем. Тĕрлĕ ушкăнсене пĕрлештерме, сăмахран, çамрăксен тата хĕрарăмсен ыйтăвĕсене çĕклеме, ятарлă комитетсем пулĕç.

Халăхпа тумалли ĕçе кирек хăçан та ваттисемпе канашласа сÿтсе явнă. Ку йĕрке халĕ те пăрахăçа тухман-ха. Çавăнпа Чăваш наци конгресĕн ĕçĕ-хĕлĕнче Ваттисен канашĕ те хăйĕн тивĕçлĕ вырăнне йышăнмалла.

«Чи кирли - эпир кунта калаçни сăмах купи кăна пулса ан юлтăр. Çанă тавăрса пуринпе те çураçуллă ĕçлемелле», - терĕ ларăва вĕçленĕ май ЧНК Президенчĕ Николай Угаслов.

VIII Аслă Пуху

28.10.2013 14:50
VIII Аслă Пуху

Юпа (октябрь) уйăхĕн 26-мĕшĕнче К.В. Иванов ячĕллĕ Чăваш патшалăх академи драма театрĕн залĕнче Чăваш наци конгресĕн VIII Аслă Пухăвĕ (съезчĕ) иртрĕ.

Съезда Раççейĕн тĕрлĕ регионĕнчен тата ытти çĕршывсенчен килнĕ делегатсемпе хăнасемсĕр пуçне Чăваш Республикин Пуçлăхĕ Михаил Игнатьев, Патшалăх Канашĕн Председателĕ Юрий Попов хутшăнчĕç. Ларăва ЧНК Ваттисен канашĕн пуçлăхĕ Петр Ивантаев ертсе пычĕ. Тухса калаçакансен йышĕнче Михаил Игнатьев, Юрий Попов, Геннадий Архипов, Николай Угаслов пулчĕç.

ЧНК çĕнĕ Президентне Николай Угаслова суйларĕç. 245 делегатран уншăн пурĕ 168-ăн сасăларĕç. Тепĕр кандидатшăн — Николай Лукиановшăн — 43 сасă çеç пухăнчĕ.

Ваттисен канашĕн ларăвĕ иртрĕ

18.10.2013 15:07
Ваттисен канашĕн ларăвĕ иртрĕ

Юпа (октябрь) уйăхĕн 11-мĕшĕнче Чăваш наци конгресĕ çумĕнчи Ваттисен канашĕн ларăвĕ иртрĕ. Ăна Канаш пуçлăхĕ Пётр Ивантаев ертсе пычĕ.

Ларура Чăваш наци конгресĕн VIII съездне хатĕрлес ĕçе туса пынине пăхса тухрĕç. Пĕтĕмĕшле Ваттисен канашĕ çак ĕçе ырларĕ.

Канашлура тĕрлĕ сĕнÿпе Виталий Станьял, Николай Енилин, Никифор Наумов, Виссарион Пряников, Василий Федотов, Алексей Трофимов тата ыттисем те тухса калаçрĕç.

Съезда хутшăнма Ваттисен канашĕнчен виçĕ делегата суйланă: Никифор Наумова, Николай Енилина тата Виссарион Пряникова.

Юпа уйăхĕн 26-мĕшĕнче Конгресăн VIII съезчĕ пулать

18.10.2013 14:46
Юпа уйăхĕн 26-мĕшĕнче Конгресăн VIII съезчĕ пулать

2013 çулхи юпа (октябрь) уйăхĕн 26-мĕшĕнче К.В.Иванов ячĕллĕ Чăваш патшалăх академи драма театрĕнче Чăваш наци конгресĕн VIII съезчĕ пулать. Унăн ĕçне 300 яхăн делегат тата 250 яхăн хăна хутшăнать. Вĕсем Раççейĕн 24 регионĕнчен, 4 патшалăхран, Чăваш Республикин мĕнпур районĕпе хулинчен килĕç. Шупашкар хулинче 30 яхăн учрежденинчен делегат суйланă.

Съезд 11:00 сехетре пуçланать.

Кун йĕрки:

1. Чăваш наци конгресĕн Президиумĕ VII съезд хыççăн туса ирттернĕ тата малашне тумалли ĕçсем пирки.

2. Чăваш наци конгресĕн ревизи комиссийĕн отчечĕ.

3. Суйлав ыйтăвĕсем.

Асăрханăр: ЧНК Президиумĕн ячĕпе хăшĕ-пĕри ултавлă ĕç туса ирттерет

18.10.2013 11:08
Асăрханăр: ЧНК Президиумĕн ячĕпе хăшĕ-пĕри ултавлă ĕç туса ирттерет

Юпа (октябрь) уйăхĕн 17-мĕшĕнче Чăваш наци конгресĕн Президиумĕн ларăвĕ иртрĕ. Унта съезда хатĕрлес енĕпе тĕрлĕ ыйту пăхса тухрĕç.

Президиум членĕсем Шупашкар хулинче хăшĕ-пĕри Чăваш наци конгресĕн Президиумĕн ячĕпе ултавлă тĕлпулусем ирттернине сивлерĕç.

Аса илтеретпĕр: Чăваш наци конгресĕн VIII съездне унăн Президиумĕ хатĕрлет. Делегатсемпе те, хăнасемпе те, съездăн тĕрлĕ докуменчĕсен проекчĕсемпе те пĕтĕмпех Президиум ĕçлет.

Хаклă ентешсем! ЧНК Президиумĕ сире çапла чĕнсе калать: енчен те сирĕн съезда хатĕрлес тата ирттерес тĕлĕшпе ыйтусем пулсан вĕсене пĕтĕмпех Президиума çитерсе пама тăрăшăр.

Кемĕр (Кемерово) облаçĕнче чăваш культурин паркĕ уçăлнă

27.09.2013 10:59
Кемĕр (Кемерово) облаçĕнче чăваш культурин паркĕ уçăлнă

Кемĕр облаçĕнчи Михайловка ялĕнче чăваш культурин паркĕ уçăлнă. Çак ĕç валли вырăнти хыснаран виçĕ миллион тенкĕ ытла уйăрнă.

Парк варринче чăвашсен пурнăç йывăçне сăнлакан кӳлепе тăрать. Кунтах саксем, вăйă вырăнĕ, спорт лапамĕ. Çулсене те асфальтланă, чечек йăранĕсем те чипер. Кĕскен каласан, кунти чăвашсем хăйсене валли илемлĕ вырăн йĕркеленĕ.

Парка Кузбасра пурăнакансене пĕрлештерекен чăваш культурин VI фестивалĕн кунĕсенче (ăна 1995 çултанпа ирттереççĕ) уçнă. Пирĕн тăрăхран унта Чăваш наци конгресĕн Президентне пулăшаканĕ Александр Иванов кайнă.

2010 çулхи çырав тăрăх Кемĕр облаçĕнче 9,3 пин чăваш пурăнать — вĕсем унта облаçăн кашни кĕтесĕнчех йăва çавăрнă теме пулать. Çав шутра чăвашсем йышлă пурăнакан вырăнсем те сахал мар. Пушкино посёлокра, сăмахран, чăвашсем — кунта пурăнакансен ытларах пайĕ. Михайловка ялĕ вара Кемĕр облаçĕнчи чăваш культурин центрĕсенчен пĕри шутланать. Кăçал вăл 105 çулне паллă тунă.

Мăн Канаш ларăвĕ

21.08.2013 13:52
Мăн Канаш ларăвĕ

2013 çулхи çурла (август) уйăхĕн 18-мĕшĕнче Чăваш наци конгресĕн Мăн Канаш ларăвĕ пулчĕ. Ларура Чăваш наци конгресĕн çитес съездне ирттерес ыйтăва пăхса тухнă.

Чăваш наци конгресĕн 8-мĕш съездне юпа (октябрь) уйăхĕн 26-мĕшĕнче ирттерме палăртнă.

Ларура съезд делегачĕсене суйламалли йĕркене çирĕплетнĕ.

Съезда К.В. Иванов ячĕллĕ Чăваш патшалăх академи драма театрĕнче ирттерме йышăннă.

Лару ĕçне Чăваш Республикин Культура министрĕ Вадим Ефимов хутшăннă.

Страницăсем: 1 ... 108, 109, 110, 111, 112, [113], 114